《抗戰落幕之送走呆呆獸(二)》

Related image

徹底地扮傻扮天真,可能係職場最佳武器,對一齊工作既同事黎講亦係最強毒藥。

 

老闆當初下放呆呆獸落黎睇多啲operation工作,可未免太過貪心啦,始終唔係人人都似佢係一個工作狂。老闆心知快踏入花甲之年,不時都提及話要開始做接班人計畫(Succession planning),確保有咩突發事,都無阻office既運作,想培養到一個可以暫時替代佢既超級近身秘書。上一代既白領高層大多有超出公司預期既承擔和責任感,就算放大假離開左香港,都依舊要係臨訓前心掛掛開一開公司電郵,睇睇有無緊急既大事發生,工作已經成為左佢身體既一部分。所以經理們成日幽默地同佢講笑:「你下次放大假要搵一個無WIFI既地方玩,逼自己無辦法登入到公司電郵先得啊!」

 

現任既呢位第二把交椅只係單純當係一個等退休既油位,有文件入佢房佢恰埋眼就簽左佢,一啲較機密既工作情報係電郵Copy俾佢,佢又真係得個知字,懶得去follow up或者知多啲詳情,空閒到係Outlook日日玩分類,到老闆突然入房搵佢傾番一個半個case時,又忘記左分類去邊個位,晒時間慢慢搵出黎,搵到先開始study發生咩事。老闆都開始感覺到呢啲行徑完全唔應該係一個職場老手應有既表現。

 

我地知道老闆唔太善於處理下屬表現不佳既情況,往往只係善意提醒,人地當然無動機聽入耳。老闆比較被動,唔想麻煩,索性帶佢出席會議時唔需要佢發言,坐埋位droup下notes就夠,返到office draft下電郵,做簡單checking,真係輕輕鬆鬆,準時放工!

 

大家睇唔過眼忍左半年,咁高職位對成個office零貢獻,仲經常未諗清楚就向我地發佈錯誤信息既指令,令大家不停地翻做,激起民憤!我地對佢既態度其實正常人都feel到有唔妥,但佢厲害在面皮比天高,任你如何黑面講野悔氣,甚至直指佢既錯處,佢仍然帶著虛假既笑容點點頭回應,心寒既感覺湧上心頭。

 

直接對佢出手似乎唔work,都係要從老闆方面入手,始終佢先係最有話事權!公營機構辭退一個人唔係咁容易,要蒐集證據,證明到佢唔達標,出過warning同佢三番四次傾過,都係無改進時先能夠proceed同佢講拜拜,所以要想方法等老闆施加壓力勸退佢,最緊要係,佢未過試用期!最後既期限就係試用期死線,希望老闆唔好心軟。

 

雖然家醜不出外傳,但你愈係收埋佢,就愈得到少既支持去廢除佢既職務。老闆介意人地會認為佢無眼光,揀咁耐最後請左個幫唔到手既返黎,事實係咁,我地更應該快快換走,而唔係由得佢,佢唔會一夜之間變番做理想既員工。係我地既勸說下,加上每日受呆呆獸亂黎既指示加重同事既workload或者出錯,老闆終於表現得強硬啲聲明要處理毒瘤,如果唔係佢實行唔到係時候要做既Succession planning啦。

 

老闆set番每樣工作既死線俾呆呆獸,等佢唔好再用「新黎」既藉口話做唔切,俾足時間跟進,有問題唔識點搞唔該一早問。無辦法,好似小學生既家課冊咁,分好晒類幾時要做好邊樣功課,交唔到功課就用紅筆remark低啦,多次重犯就可以考慮記缺點。同時,俾多啲機會佢同其他部門同事接觸,一來可以客觀啲睇到佢仲有無可取之處,二來繼續搜集出錯既地方去同佢講。

 

兩個月後,佢以返工交通時間太長為理由,遞信了。

 

以為遞左信就安心? 習慣搞搞震既人係好難改變,佢仲有一星既假未清,正常黎講需要放埋先離開,否則當自動放棄假期。不過佢想要encashment,即係唔放假換番錢,老闆既然已收到佢既辭職信,好直接地拒絕encashment既要求,佢唔放一星期假,返到黎只係匿係冷氣房hea,咁真係無必要俾佢耍賴皮到last day,呆呆獸知道後就換個講法話係因為財政問題,希望拎多一星期錢,唔好玩啦,如果係咁缺錢,就唔會選擇放棄份油工,道理上唔成立。我地相信以佢咁精明既性格,一定都係搵到新工先遞信,只係想要多萬零蚊洗下。到Last Day當日,無farewell lunch,佢靜悄悄地準時離開了。