《轉新工,為何光環就失色了?》

以前係知名公司工作時,著住名牌子既套裝高跟鞋係中上環出入,每朝早都會手拎著一杯Tall size既星星咖啡返office,裝出一副高人地幾級既look。你可能覺得好假姐,但係人人都係跟緊呢個玩法時,而你又明知大部分公司同事都真係諗到咁單一,以look黎驅分人種時,你就只能選擇:一,跟隊;二,離隊。

 

由普通一個officer,打滾幾年升到做一條team既supervisor,再得到老闆提攜,終於有專屬自己既房間,猛車邊上到管理層level,似乎有一條亮麗既康莊大道係面前。同事對於不同階級享受既待界分得非常清晰,稱得上係manager既就係最接近自己既老闆。下屬禮物既奉承、攬曬多餘既工作上身係小恩小惠,只要你識做,係大老闆面前多多提及佢地既存在和功績,佢地係絕對會毫無保留為你賣命!

 

曾經,你都一樣夜媽媽餓著個肚加班到三點,雙眼長期對著電腦好浮腫都唔理,依然努力去打扮醒神落力去表現勤懇既一面。小時對於黑白好分明,入到職場後,好容易就被想上位既諗法模糊曬所有堅持過既原則。只要achieve到目標,過程中染一點灰色,who cares?

 

當去到一個位人人都吹噓你係時候放低套盔甲挨係大班椅嘆,潛移默化下,你就只志在日日享受下屬送上既光環。簡單去attend meeting present幾句,根據draft report小修小改,連send個email出去都有秘書代勞,佢呢份工真係好易做!

 

悶到核爆做左十年,想係退休前最後一擊升個職,座擁十幾廿年既工作經驗和成個部門同事既歡呼擁戴,自信心滿瀉,想要個靚title應該無難度啦!

 

Leader,唔是咁易做的。

 

轉一份工,係要有將一早已透入肌肉既工作memory完全洗去既覺悟,要有好大既耐性和動力。黎做一個Senior Manager或者Assistant Director位,要有充足既根底先俾到advice,有條理俾到make sense 既指令下屬。

 

成功轉會後,僅僅做左三個月,點解就已經迅間惹怒成條team既同事。捱左十年定係嘆左十年,一試便知龍與鳳。黎到新地方,關係未打好,基本運作都未pick up,又無背景人士支撐,的確係未有資格諗住係度hea。成日打著自己係新黎既旗號,同事就算幾有心機提供曬reference/policy俾你參考,你個心一直只係想落order下屬搞掂就得,前線既工作理都唔想理,咁係無可能work,只會俾後生既標籤做「廢老」。次次左耳入右耳出,嘗試俾文件你check下,你又覺得已有樓下既Assistant Manager check左包底,到後未偶而被發現原來你連check文件用既template都唔知放係drive既邊個位置,嬲,都好正常吧!

 

加上堅守住唔願做既信念,成日話新話新,耍太極主動出席「坐only」既會議,其他要俾advice要同其他部門傾做法既會,由得老闆一個人無奈撐住。小事麻煩事就send個email 講句“Please follow up”,大事重要事就避得就避。咁既手法,可以玩到幾耐呢?其他同事看在眼內,點樣評價你唔通一點都唔在乎嗎?

本身老經驗,絕對係寶,而家光環驟然失色,就係源於自己太貪心啦,「倚老賣老」。