《我地係某某某大機構既HR,就可以打尖了?》

自從鼓勵外國或內地輸入專才計劃開始,HR需要處理更大量既Working Visa申請,與入境處係信件上來來回回確認資料先可以成功獲得批核。實話實說咁多年黎佢地工作效率的確幾高,雖然每逢打熱線永遠都聽到:線路現正繁忙,請稍候,你既輪侯位置係……四十…三十…等到頸都長!不過一通電話後都做到快問快答,就算當值officer唔可以即時肯定答案,會識得請我去send個email,而封email至少唔會石沉大海,得唔到回應。

九成既申請實際上所需既時間都比官方寫既為短,再及早通知我地去拎取和要注意既事項等等。少有機構執得咁標準,所以我唔希望有任何怠慢。「專才」本身或聘請「專才」既部門從來唔care入境處列明申請一個全新既visa係要大約一至兩個月既時間,永遠覺得自己手頭上既都係urgent case,HR無理由唔「識做」,打個電話俾對方既officer催促下就好快成事架啦!佢地覺得admin工作最煩厭最低級,HR呢啲蟻民,咁既要求都做唔到就暗指係我地無用。順勢黎遷怒於我地,認為十成十因爲手腳慢,而逼令到「專才」唔可以盡快黎到香港開始新工作。每次我地雙重反白眼後,善意解釋都係徒勞無功。

無縫接軌既工作流程
我地對無縫工作既定義好簡單,先完成A job,係等緊A job俾老闆俾comment和approval既同時,開始做B job同準備A job既後續再拎定C job出黎,加促每一步無縫緊接去到最尾。但係呢,係其他部門既高層眼中,你ABC job一次過做晒先係最快,用盡你既24小時先稱得上係無縫啊!做人唔好咁孩子氣,我ABC job一次過做晒當然得,但有用嗎?基本上係零管理經驗既人或者全無人情味既人先講得出呢句說話。有幾多完整版要跟足程序做完先可以俾到下一手,再繼續推進劇情。

有經驗既HR,係當部門討論緊想聘請外國/內地人士黎工作既時候,已經著手準備,睇返邊款計劃適用於candidate,搵定張ID990A表格,draft定合約,一簽完合約就我地就會有表格自動遞上。唔洗慢慢上網睇sample點填,我地事前盡可能係表格電子版輸入晒資料,佢地核對無誤後,貼埋張大頭相簽個名就可以即刻搵快遞哥哥郵寄俾我地。

打尖係HR份內事?
除左部門同事係我地老闆,candidate幾乎都有同等尊貴既地位。

由於「專才」身在外地,又必須要佢地提交正本表格過黎,所以無辦法只能每日keep track住份文件去到邊,快遞時間好視乎地方既位置,試過係一啲較偏僻既地方寄過黎,一等就係一星期……控制唔到既情況係最令人焦急,更何況係等人用既部門主管?

「唔明點解要等咁耐,HR你地打個電話去,話我地係某某某大機構,份文件要特急,唔該送左過黎俾我地先咪得囉!你地咁驚一係俾個電話號碼我自己打過去問啦。」

亲,人家已經係「快」遞,其實仲有咩餘地去催促再快啲?人家絕對唔係服侍你一份文件的。

到終於收到件,加埋好乖咁一早填定僱主既ID990B表格,齊晒相關文件啦!你又以為坐火箭咁快直接入到老闆枱俾佢approve?絕對唔係咁輕易左手交右手,到秘書姐姐個關要過!佢既權威不下於老闆,就係靠我地平時吹水報料打好關係,先肯半推半就幫我地既急件打個小尖優先處理。係內部成功打到尖係功勞,係出面打尖就有損公司既形象!

當文件已齊備上繳,就開始漫長既等待時間。我地預計到部門主管坐唔定,每日一call一email,務求逼到你入牆角幫佢地追功課。可惜我已經唔係fresh grad,呢招對於我不痛不癢。

「唔係嘛,官方寫要等四至六星期批核時間?我等得個candidate都唔等得啦!搞個working visa洗唔洗咁耐啊,你地HR出封信俾佢地話好緊急一星期內要有啦!」

緊急情況既運用係有quota,加上我地係某某某大機構,唔怕俾人report上生果報紙炳我地濫用特權嗎?你要打尖都唔好咁惡,人地無必要去please你。出信要有條理,唔係潑婦罵街人地就怕左你,機構有一定規模有時當然係好辦事,但亦要好謹言慎行避免有痛腳被捉到,小事化大。首先人地未提供檔案編號,夾硬打去問係隨時被拒。當我地收到編號係等待既中途,有出信件盡量提供番有用既資料,可能係呢位candidate曾經係我地機構工作時既簽證和合約等等,希望對方搵番紀錄加快批核過程。而非完全零協助,行埋去俾張卡片孤假虎威,伸大手板人地就自動俾你先。

HR唔係打尖既工具,本人亦唔喜歡係非逼不得已既情況,事事都話urgent,寵壞自己人只會後患無窮。所以,要教育一下。