《工作如愛情,只為找一份保險的?》

「請問你有無問題想問番我地?」面試黎到尾聲,係時候發問最後一個問題。

 

「想問下……呢份工係renewable 既contract 黎架呵?即係會唔會話部門無筆直就cut位啊?」求職者一臉緊張。

 

「部門會睇番同事既表現而決定會唔會續約……同埋……」話未講完就已經俾對方心急截停左。

 

「唔好意思,你未答我問題……係咪即係無咩事就一定有得續?」

 

一定?世界無一定的。

 

「係續約前,同事表現和部門既筆直都會係其中既考慮因素。」本來心知公司個norm係無特別表現差劣既問題的確會一直renew到退休,不過norm係唔可以當係一個承諾,以為不變既事實講出黎。HR要保持淡定,忍得住口,分清楚可透露既程度。

 

完左一次面試,你就了解最近既求職者渴求什麼。80後既一批踏正合約制普及代既適應期,對合約制或多或少有卻步,更出現錯覺誤以為合約工就等同散工,老闆唔肯請佢做permanent 意思係貶低佢工作能力。但當你經歷過其中之後,你會發現,唔少合約制同長工差別已經愈縮愈小,或者係各有好處。

 

合約制大行其道,你要封閉所有機會嗎

唔單止私人公司,最受歡迎既政府工或者公營機構工大部分都係合約制,係咪合約制等同福利薪酬一定不如長工?最直接係影響到年資上既計算,如果機構有心扣除同事既福利好可能係續約時要求斷幾日再重新開始一份新約,keep住每份約都break service就永遠都唔會拎到可觀既長期服務金,而係可以滾存既年假上亦要重來。為左避免呢啲麻煩同擔心,唔少人寧願選擇人工較低,發展機會較少既工作,一直諗住只要係長工就可以,起碼無咩特別事應該唔擔心俾人炒,安安穩穩過一世就好,唔想再心驚膽跳相隔幾年重覆搵工、見工、等offer既擾人程序。

 

環球招聘顧問公司曾於2017年訪問左五百多個僱主,反映出合約工招聘將成為大趨勢,逾半受訪僱主曾招聘合約員工,而其中45%表示曾將合約員工轉為全職員工。當中部分合約員工均與全職員工一樣享有年假及醫療福利,額外再給予約滿酬金。大部分工種陸續新開更多合約職位,如果一刀切讓自己閉著眼完全唔揀合約工,其實係斷然減少工作機會。

 

世上沒有保險的愛情,也沒有最適合你的工作

不要太多幻想,一生只嚮往真命天子,一日滿足唔到你所有要求既條件,就唔去嘗試。嘗試係為左進一步確定自己既想法,累積左經驗你先識得分自己最喜歡什麼。揀伴侶時大家可能一見鍾情就出擊,又可能千挑萬選,揀左最貼近理想結婚對象既一位,以為白頭到老,點知就不明不白火速被分手。太多既計算未必得到最穩妥既結果。

 

當初我同窮生在一起,朋友都以為我身邊既一個係保守老實,照顧周到既爸爸型暖男,當然大家都大跌眼鏡!哈哈!我自己「事後」都嚇左一跳,大家唔好想歪,係當我發現自己搵到喜歡既人後,就只係識一股傻勁去諗點樣「得手」。唔敢去計算值搏率,加上佢神秘、警戒心強和喜歡思考既性格,我係完全捉摸唔到點樣做會真正討得佢歡心。工作同樣係等你黎爭取,如果明明喜歡工作性質,有想入職既公司,但礙於係未來幾年後完成左一份合約期後「可能」不獲續約而拒絕機會,甘心嗎? 任何工作本身都存在風險,就算係政府工都有唔少人想離開呢個看似夢幻既堡壘,想理想與現實距離縮短,係要靠不斷既嘗試和新啟發。

 

追求工作與生活的平均值

新一代既工作方向,已經唔再係單純由人工去主導,亦好少再一份工做到退休,追求一個可以享受小快樂既平均值。大家都好清楚,老闆加你兩千蚊升你職,但係對你既苛刻要求和要承擔沉重既責任根本補償唔返,時間亦奉獻晒俾公司。近幾年聽到更多員工寧願唔升職,騎牛搵馬搵過份舒服少少,就係希望仲可以係忙碌中享受小小既私人生活。合約制既束縛比長工少,薪酬福利幾乎一樣,完整地完成一個合約期更有一筆約滿酬金,其實我地臨完約時唔係苦惱等待老闆肯唔肯,認唔認同自己既能力,而係雙方有一個空間,思考一下黎緊繼續不變定各自有新方向。特別係香港男女都相對平等既社會,唔應該再係主力由男方去全包搵錢既責任,男女都有自由追求工作與生活的平均值。

 

工作和愛情,都確保唔到可以買一世保險。想要啲咩?有時當下既直覺已經俾到你答案。