《黑名單與Rehire的意義》

大家成日吱吱噚,談論HR手上有多份黑名單,邊個離職或者被離職後就會永不錄用,答應左黎面試然後no show既又自動入榜,甚至可能小氣到係約求職者面試,多次唔聽電話唔覆邀請面試電郵都一一列入名單之內,究竟HR部門係咪真係咁記仇咁無情講先?

 

小熊都有質疑過黑名單既作用有幾高?主要實際原因有二,會否Rehire,以及記錄並分析出現被打靶既原因。

 

Reference Check上常見‘Rehire’一欄

局外人第一時間係考慮到會有幾多位鬧得唔愉快離開公司既員工會食回頭草先?難道每次請新人番黎都check一check有無係黑名單出現過?如果作用只有咁實在太無聊!你想得無錯啊!Rehire最大用途其實唔係對內而係對外,隱藏得太好大家都少留意。你以為摣頸就命被自願辭職,換黎reference letter好端端寫上‘Resignation’就十足安全嗎?

 

少年,你太睇少一個半個字既威力了。

 

當你搵到新工後,公司HR自自然會請你簽名agree做reference check,最後既危機就逼到埋身了。

 

Reference Check既表格上總會有類似‘Would you rehire this applicant?’既問題問番前僱主,背後既含意,你明我明。如何左右個答案,就睇你同前僱主關係僵持到邊個程度。一般HR收到form,無須知會前員工既上司,跟據system既資料已足夠完成得到。不過假如check到你係on the list,又或者曾經有任何disciplinary action既紀錄,填Yes or No就需要請示上級了。

 

係咪填Yes就無運行了?

想過到試用期都凍過水?

 

咁就要睇你有幾命硬了(笑)。

 

確實曾經有disciplinary action係危危乎,但如果對方只係剔左唔願意rehire,係試用期內盡你能力表現投入啲認真啲,部分僱主係會繼續延長觀察時間。較為理性和有人情味既,係會理解唔Rehire可能包含左個人恩怨,新同事對過往有隱情或者會更珍惜新工作。但會唔會咁岩遇上有心又唔計較既僱住?Nobody knows。

 

製作黑名單睇得出老闆性格

每間公司都暗藏住一份神秘既黑名單嗎?當然唔係啦!小熊做過既公營機構就無呢枝歌仔唱,會番黎做既同事有好多,但同時隨時replace你既人亦如恆海沙數,無論咩理由離職,唔再評價,寫句因資料confidential而唔提供,對HR黎講係好做得多,愈來愈多大公司老闆已經跟從同樣做法,免得自找太多麻煩,佢地都認同一個想法,一個員工既然離開左公司,以前係公司係點已經close file,無謂加一腳影響人地前途,由得佢係其他地方重新開始好過啦!黑名單用黎記恨,除左令自己不停耿耿於懷,又真係對公司和員工有咩好處呢?