《中伏全職工竟然不如做個temp》

「幫手睇睇份合約,覺得點啊?」身邊既朋友知道小熊做開HR,每每有職場上入職既疑問,都好常會問我意見,一齊討論下。嗯……俾得份具體既合約我睇,意味著九成機會約已簽,心入面都希望啲條款唔會有令我驚嚇既感覺啦!

 

細看之下,心知不妙。

 

點解一份全職既補習導師合約工作,福利和薪酬基本上同臨時工無異,而且好明顯為左維護公司利益,仲額外加上一啲罰則,咁令人無保障又提心吊擔既工作,真係為左呃fresh grad而訂立出黎。

 

「話就話返五日,但係佢寫明星期六日係無糧出,仲要頭三個月法定假期係無薪,唔好比佢寫既月薪呃左,要問清楚究竟呢個月薪係固定一個數目,定係每個月會扣除番星期六日既人工?」

 

「係喎,可以頭三個月法定假期係無薪架咩?我都未試過!」朋友開始為佢既fresh grad表妹擔心。

 

「勞工法例有寫明按連續性合約受僱滿三個月後,法定假日必須有薪,所以一般請temp只會符合勞工法例最低要求。當然我地係因為做開大公司,所以一入職已經享有有薪既法定假期,你唔知原來咁幸福呢!不過我見佢本身既人工唔高,加上七除八扣之後,其實不如做temp好過,起碼係自由身,同時做幾份兼職份糧一定多過一份呃人入局既工。」,當你做得一份全職工,自然想投入更多得到認同得到晉升,但眼見到數量如此多罰則既時候,心都酸埋,你就知道,呢間公司不過當每位員工係過客,信任只係建基於單方面訂立既規則上。

 

好多人都會認為份約好唔好?睇彩數啦,其實不然,係香港黎講始終係有個pattern,某啲行業筆直緊絀又難請人時,你以為會放鬆條款吸引人去申請?唔係啦,好多時係會計到盡搵位要你嘔番部份糧出黎,應該要更小心睇清楚有無出古惑。有僱主會認為我出糧請左你返黎,陣間你黎教得好地地,啲學生和家長鍾意黏住你,容咩易撬走晒我啲客仔,隨時係我間中心旁邊自立門戶?結果佢地應對既手法就係設定野則等你唔好咁得意,遲到罰錢,早退罰錢,無試用期,返左第一日你感覺唔岩心水想即走都唔該賠一個月錢俾公司,一個月請半日假即無勤工獎,又唔批准係合約期做同類型工作云云。聽入耳都辛苦,何況真係要經常提醒住自己唔好犯呢啲問題呢。

 

最後fresh grad妹妹命運如何?朋友當然叫佢快手撥個輪交代聲話唔take呢個offer就算啦!fresh grad妹妹未踏入殘酷既職場,依然好唔好意思就咁樣作出拒絕,將責任推晒俾自己。雖然係道德層面黎講,係應該考慮周全先決定簽約,不過都明白唔少fresh grad心急想得到一份工作先,大多係想令家人安心而多於去比較自己係咪享有應得既福利。預料到對方冷淡回覆,仲要求fresh grad妹妹寄回合約俾佢地keep番。一般黎講簽約時會係一式兩份唔需要人地「還」份約,可能係作為僱主既一個落台階吧,無謂要特地浪費$2郵費,不如請佢碎左份合約唔好留底就算了。

 

閱讀一下勞工法例唔係老土怪或者HR先需要做既事,唔想入職後先發覺自己被剥削被壓榨唔知點算,就乖乖為自己花啲時間理解多啲應得既保障啦!