《免費是為了什麼》

免費報紙、做義工、派贈品,唔計成本免費送出貨物或服務,換黎既可以係宣傳效用,又或者自我既滿足感。

 

小熊雖然毫無名氣,但係阿媽教落,懂得飲水思源,數一數,呢個專頁經已開設左四年幾既時間。HR熊既出現,係因為曾經係工作上無發洩既途徑,窮生就鼓勵我不如寫低自己既故事,表達憤怒與悲傷既感情。所以我一直都講我並唔係啲咩大作家呢,抱有私心咁純粹去講述下經歷和係HR工作上既有趣見聞。而開始有讀者出現,同我講由我既文章中得到共鳴,係意想不到既收穫。小熊就開始投稿,而一直支持及任由小熊發揮既係輔仁媒體,試過有網友不滿我既觀點而留惡意CM批評,容總不唔會因為一兩個LIKE數而不合理去遷怒作者,可以做到對事不對人,真係好感謝容總,我好喜歡呢種自由而得到尊重既感覺。陸陸續續多左網友認識小熊,會PM我傾談工作上既煩惱,甚至有其他媒體轉載我既文章,搵我寫專欄,更加有一世女可能只有一次上電視既機會。還有可愛既網友,見到有新既媒體轉載左我既文章,立即附上網址趕頭趕命問我係咪知情,保護緊我擔心有人未得我同意而分享左我既物品,有時你地真係令我有點受寵若驚!

 

好運氣遇到好人好事係非常難得,亦有唔少人對免費既定義有另一種睇法。

 

平時大家返工時,係地鐵經過都可能會順手拎番份職場雜誌上車翻閱,或者你地都曾經係上面閱覽過小熊既文章。由今日開始,會係其中一份職場雜誌暫時見唔到小熊既足跡啦。作風比較正式既出版商,容易變左係一種交功課既模式。小熊按時按候免費供稿,負責既編輯就係死線前隨意催促一下,如果見你既題目字眼唔岩心水,會自行更改而唔會事先通知。原來咁既模式已經不知不覺持續左兩年幾,小熊敢說從來都無試過遲交一次,而每次得黎既係機械式既官方回答。會唔會係度諗既然作者都肯免費提供材料,要求佢再做多啲都OK吧!

 

所以除左例牌催促,開始一次又一次希望我按佢想得到既主題去寫文章。有少少鬱悶感覺,本來已經感受唔到丁點既人情味,睇黎仲要按你既所需所想去幫你完成你既工作,不期然用左三個「你」字,正正係強烈感覺對方只為自己著想。釐清「合作關係」,無一方面係under對方,免費供稿亦唔係老奉。當初同意讓我自由隨心去寫,還嘗試爭取微薄稿費以示支持,轉手後,只跟自己設下既規矩做。自願一直係免費既又何需要幫你爭取任何野?其實免費既本身,都會有感受。

 

稿費有既話一定係開心(笑),無既話只要係自己喜歡做既自然繼續go ahead,有網友唔理解,以為開得專頁既人都係想做KOL,出錢賣廣告搏取得到贊助或出鏡機會。如果係真既,我就好失敗啦,唔刻意寫「十大成功面試技巧」,「五個討好上司的時機」,「三個你不得不知的晉升小貼士」呢類隨口都講得出,又較易吸納新讀者既題目,我只係想認真分享「心果句」,勉強堆砌出來無咩意思,大家咁聰明亦會睇得出。

 

今次既決定清除左閹閹悶悶既感覺,無咩唔好,可以再隨心所欲去寫「心果句」。