《食回頭草,能否再下一城?》

以前係大機構工作,可以一份工做到退休係巴閉既,你有咁既能耐過渡數十個年頭黎所有唔順心既問題,老闆亦對你既工作表現有一定程度既欣賞。而到左今時今日既香港,成日都話啲後生仔jumpy,其實係佢地多左選擇,變相會係自己角度出發更多,食回頭草係等閒事,特別係大機構裡面見怪不怪,已經唔會再係一件覺得羞恥既事。

係公營機構入面,稱呼為經理既大有人有,係經理之中再分幾級。早排有位細經理回歸去自己做開既部門,佢以前由intern做起,屬於實幹型,畢業後個個都想留佢就順利成章將佢轉全職,俾左一個大家都明知既難頂位佢捱下。對於呢類型既人黎講,佢會寄望有人appreciate佢既付出,唔介意蝕底啲長期加班,花時間熟讀晒所有相關既policy,但經理們知道有呢種性格既人就當然盡情壓榨啦!真係少啲意志都會精神崩潰,心力交瘁。捱過左幾年,又有經理點頭,可以晉一級!

點知,今次先進入真正既地獄。做中層既,得唔到上司既支持,又無幫得手既下屬,等同一人要擔當晒所有角色。以往,佢都可以憑著自己勤力肯學勉強地解決到大部分問題,而家一個case pass俾佢跟,無人講解成個procedure,如果係自己做細既,有咩錯漏硬食都唔緊要啦。問題係細既旨意佢有晒standard話佢地知要點做,就算佢參考舊時既sample同policy,由頭set up番成個工作system出黎,都需要大量時間!呢個境況重覆又重覆咁發生,所有事都係unexpected咁持續發生,唔錯既人工同福利package一直拖住後腳令佢唔捨得辭職,過左兩年,突然間佢對自己失去信心,毅然決定要離開,俾自己好好喘息一下。

之後就去左私人公司做返相關既工作平穩咁過,雖然比以前過得舒服,但畢竟又過左三年,隱隱約約浮現出想升職既心態。舊公司部門既高級經理主動聯絡佢,就話而家有一個升職位既空缺,覺得佢好合適叫佢申請。佢掙扎左好耐,package唔洗明言係好好架啦,只係佢心水清要去重抬類似以前既惡頂位,受唔受得住?

再一次,回到從前既戰場。

食回頭草,多多少少有心理關口要過。想唔到,回歸既第一日,一班舊同事非常歡迎佢呢位救星返黎!大部分同事其實好明白點解當初佢選擇走,佢地又何嘗唔想呢?就係無勇氣。所以有實力既,只要唔係工作上做到一榻糊塗而被踢走既話,返黎做,why not?而且仲係返黎升職,理由冠冕堂皇!今次佢有備而回,最緊要係精神上放得開,公營機構有佢自己既玩法,一個人默默做只會沉淪係痛苦之中。佢take up得呢個位置,就唔應該所有task攬晒上身處理,而係要做好管理同分配資源。佢開始慢慢適應,提住自己要忍耐,唔好再一頭牛盲目衝衝衝,對下屬開多啲綠燈俾機會佢地獨立處事,偷多啲時間俾自己學懂去做決定,得人心比起完美地完成工作,係更好既籌碼。做事手法都要培養,習慣後自然更得心應手,睇黎佢又可以set定下一個目標!