《又,鬼鬼祟祟去旅行?》

難得請到長假期去個短途trip,一心只係想咩都唔理,舒舒服服享受下私人時光。不過呢,總係會有啲不識趣既同事去「關心」你去邊度旅行,託你順便幫佢地入下貨。當然唔好咁傻瓜咩都應承晒佢地做壞規矩,買三幾樣得體既手信返黎應酬佢地就可以啦。唔好睇少一班師奶仔同事,佢地絕對係旅遊達人,老闆唔係位既話,就會密密上網睇定旅遊資訊,幫一家大小安排又抵又好玩既行程。所以,你請食咩手信佢地一定全部知價,如果係平價貨小心暗地裡俾人唱你吝嗇,分分鐘背後要承受一大堆閒言閒語,有排你受……

有位平時唔聲唔聲既男同事就係為左免卻麻煩,煞有介事申明自己只係番大陸玩幾日,又或者留係香港攤抖下,點都唔係出國咁話!大家最初都覺得佢只係有啲奇怪,可能只係唔想我地煩佢。點知係佢放大假第二日,大家lunch時無聊睇面書,就見到佢俾女朋友tag左張係九洲影既合照,仲笑得非常燦爛!「原來阿文識笑架!即刻陽光好多!幾好睇!」大家既第一反應竟然唔係責怪佢呃我地,係真正關心呢位小伙子,始終佢仲係入世未深吧!

睇得一張旅行照邊可能滿足到我地,索性click入去佢面書睇啦,咦?連頭先個張合照都無埋既?睇黎佢應該醒水快快手delete左了。我地靜靜互相對望,大家都心照呢件事唔好係阿文面前提起。

到阿文番到黎,大家啲行為和說話都怪裡怪氣,我估阿文都好懷疑究竟我地有無睇到啲相,比平日更害羞,好似做錯事既小朋友唔敢再講再問。去得咁鬼祟又咁驚青,好無謂,開心share下旅行趣事和得意手信,係一個好機會拉近大家既關係,最後都係方便自己工作,唔好諗住晒錢晒時間去付出少少就實係自己蝕底,蝕底就咩都唔願意做。

由一踏入職場開始,係唔可能放工後完全無視公司既人同事 ,除非你無諗過要長做、係同一間公司升職,否則佢地既目光,對你既印象都係你向上流既踏腳石,咁你都要識趣啦!去旅行都要寄掛埋佢地一份啦!