《鬼鬼祟祟去旅行?》

難得請到大假去個短trip,同事們一收到風,通常就會蜂擁而至託你買呢樣買個樣。無辦法!為左同班同事維持友好關係,雖然覺得好煩擾,但係實在唔知點推卻,仲要一定要記得買一堆「得體」既手信返黎!尤其一眾師奶係旅遊達人,平時一有空閒就上網睇旅遊資訊,你請食咩手信佢地全部知價,如果見到平價貨會暗地話你吝嗇。

有同事為左免卻麻煩,煞有介事申明自己只係番大陸玩幾日,或者留係香港攤抖下,絕對唔係出國!不過大家心知肚明,一個善意謊話背後要承受一大堆閒言閒語,有排你受啊.…..

「你估我地唔知咩?孤寒鬼少少手信都唔捨得買!」

「有啲人好自私架,自己放假咁開心,幫手買下野都唔得!

冷嘲熱諷源源不絕單打你,真係諗起都怕怕。

請大假去玩,無錯係你應得既福利,不過似乎要斬個五關六將先過到。首先阿頭會問你點解要放假,明明假係自己都要盡量俾個滿意解釋佢。然後,再要同你既上司下屬夾會唔會撞假,逢親公司有活動或者大家爆緊倉既時期,你想請到假既機會等於零。請個假事前要好好計劃,仲要顧及周圍既同事,最後要得到所有人安心approve,明明興致勃勃等放假既心情都變得充滿顧慮起黎。

由一踏入職場開始,其實已經唔可能放工後完全無視公司既人同事 ,除非你無諗過要升職咁就無必要同其他人打好關係,如果唔係佢地既目光,對你既印象都係你向上流既踏腳石,咁你要識趣啦!去旅行都要將佢地放埋係行李箱度啦!