《人事部…係公司支柱?》

小妹入職HR雖然只有三幾年,但八卦事多到數唔晒,果然做一個厲害既天文台係做HR條件之一!

一間公司唔怕人多,最怕是非多,特別係大公司度做,員工閒閒地過千人。曾經聽過經理好驕傲咁公開講公司無左HR唔得,而我幾乎每次同其他部門既同事表明身份後,佢地都會即刻變得笑盈盈好有禮,但我一直提醒自己唔應該有虛榮感,因為一切只係利益作祟。

HR係好多人心目中係掌管住所謂一個員工既生老病死,由入職、升職加人工,到最後離職,我地有權力左右到唔少決定,之但係,so what?員工往往真正付出幾多,我地又實際知道幾多呢?

落手落腳係前線做既同事,其實佢地已經係最直接表達感情同意見既一群。試過佢地第一日上黎返工簽約,有同事會求其俾份合約佢睇完簽左就算,覺得解釋都浪費 時間,佢地可能即刻俾反應出聲話覺得唔受尊重,甚至問多兩句都無人理。有時同事直接打上黎問野,又會有人嫌佢地粗聲粗氣,快快答完就cup線,衰既仲會加 一句:「唔好有咩都打上黎問啦!」。見到呢啲情況,點都要做啲野幫手打圓場。

HR係一份專業,不過如果由過於hea既人去把關緊要既「支柱」,就會出事!人同人之間係互相影響 ,點解成日請唔到人,點解流失率咁高,其實一次印象、一句說話、一種態度,加加埋埋就係答案。

1 thought on “《人事部…係公司支柱?》

  1. 嗨!這是一則迴響。
    要刪除迴響,請登入後瀏覽文章的迴響,那兒你可以選擇編輯或刪除它們。

Comments are closed.